2 сәуір – Дүниежүзілік аутизм туралы ақпарат тарату күніне орай, Ұлттық балаларды оңалту орталығында аутизм спектрі бұзылған балаларды тәрбиелеп отырған отбасыларға қолдау көрсету мақсатында Ашық есік күні ұйымдастырылды.

Бұл іс-шара қоғамда аутизм мәселесіне қатысты хабардарлықты арттыруды, толерантты көзқарасты дамытуды және ата-аналар мен балаларға нақты практикалық көмек көрсетуді негізгі мақсат етті.

Бағдарламаның салтанатты ашылуында ерекше қажеттіліктері бар балалардың қоғамда өзін қауіпсіз сезінуіне және қоршаған ортада қолдау мәдениетін қалыптастыруға бағытталған «Мен ерекшемін – түсіністікпен қараңыз!» белгішесі таныстырылды.

Күні бойы орталыққа келушілер неврологтар мен психиатдың, сондай-ақ психолог, дефектолог, эрготерапевт және АФК мамандарының кәсіби кеңестерін алды.

Ата-аналардың біліктілігін арттыру мақсатында «Аутизм әлемі» тренингі мен арнайы семинарлар өткізіліп, маңызды сауалдар төңірегінде талқылаулар жасалды.

Сонымен қатар, іс-шара аясында «Біз ұқсаспыз, бірақ біз өзгешеміз» атты тақырыптық көрмелер, фильм көрсетілімі, қызметкерлер арасындағы «Көк қашықтық» марафоны мен «Қолдау ағашы» арт-акциясы ұйымдастырылып, қоғам назарын маңызды әлеуметтік мәселеге аударуға мүмкіндік берді.

Орталық ұжымы осындай іс-шаралар арқылы әрбір баланың дамуына және қоғамға бейімделуіне қолайлы орта қалыптастыруды жалғастыра береді.