Ұлттық балаларды оңалту орталығының Басқарма төрағасы Ажар Ғиният медициналық мәселелер жөніндегі орынбасары Айгүл Тулебайқызымен бірге Приозерск қаласындағы «Балқаш» емдеу-сауықтыру кешеніне жұмыс сапарымен барды.

Сапардың негізгі мақсаты – ерекше балаларға көрсетілетін оңалту қызметтерінің мүмкіндіктерін кеңейту және өңірдегі медициналық-сауықтыру әлеуетін тиімді пайдалану бағыттарын талқылау.

Сапар барысында Ұлттық балаларды оңалту орталығының өкілдері «Балқаш» емдеу-сауықтыру кешенінің медициналық базасы мен инфрақұрылымымен танысты. Кешен санаторлық-курорттық емдеуден бастап медициналық оңалтуға дейінгі қызметтерді көрсетеді.

Кездесу барысында балаларды оңалту бағытындағы өзара іс-қимылдың перспективалары талқыланды. «Балқаш» емдеу-сауықтыру кешенінің ұжымы ерекше балаларды көбірек қабылдап, олардың денсаулығын нығайтуға және оңалуына үлес қосуға дайын екенін жеткізді.

Өз кезегінде Ұлттық балаларды оңалту орталығының мамандары балаларды оңалтудың заманауи тәсілдері, интердисциплинарлық жұмыс және осы бағыттағы көпжылдық тәжірибесімен бөлісті.

Кездесудің маңызды нәтижесі – екі тарап арасында ынтымақтастық туралы меморандумға қол қойылуы болды. Құжат балаларға арналған оңалту қызметтерін дамыту, тәжірибе алмасу, медициналық мамандардың кәсіби әлеуетін арттыру және өңірлердегі оңалту мүмкіндіктерін кеңейту бағытындағы бірлескен жұмысты дамытуға мүмкіндік береді.

Тараптар ерекше балаларға көрсетілетін медициналық және оңалту көмегінің сапасы мен қолжетімділігін арттыруға, сондай-ақ жинақталған тәжірибені тиімді пайдалануға бағытталған бірлескен жұмыстарды жүзеге асыруға ниетті.

Ұлттық балаларды оңалту орталығы мен «Балқаш» емдеу-сауықтыру кешені арасындағы ынтымақтастық ерекше балалардың оңалуына қолайлы жағдайларды кеңейтіп, медициналық оңалту саласындағы тәжірибе алмасуға жаңа мүмкіндіктер ашады.