Ұлттық балаларды оңалту орталығы Шэньси провинциясының (ҚХР) ресми делегациясын қабылдады. Орталығымызға Сиань, Баоцзи және Тунчуань қалаларының Мүгедектер федерациясы мен оңалту клиникаларының басшылары келді. Делегацияны көпжылдық серіктесіміз — Сиань дәстүрлі қытай медицинасы ауруханасының директоры Сун Хуцзе мырза бастап келді.

Сапардың басты мақсаты — балаларды оңалту саласындағы халықаралық ынтымақтастықты дамыту және тәжірибе алмасу. Қонақтарды Басқарма төрағасы Ажар Ғиният қарсы алып, оларды орталықтағы кешенді оңалту жүйесімен және ерекше балаларға көмек көрсетудің барлық кезеңдерімен таныстырды.

Орталығымыздың ауқымы мен емдеуге деген кешенді тәсілі қытайлық әріптестерге зор әсер қалдырды. Әсіресе, балаларды қалпына келтіруге қажеттінің барлығы бір алаңда шоғырланғаны олардың ерекше сүйсінісін тудырды: роботталған оңалту зертханасынан және гидрокинезотерапияға арналған арнайы бассейндерден бастап, өзіміздің қысқы бағымызға дейін бар. Сонымен қатар қонақтар қытай медицинасы кабинеттерінің жұмысын және инемен емдеу әдістерінің бізде ресми түрде емдеудің клиникалық хаттамаларына енгізілгенін жоғары бағалады.

Орталықтың мүмкіндіктері мен әлеуетіне тәнті болған Қытай өкілдері тұрақты түрде тәжірибе алмасуға зор қызығушылық білдіріп, ынтымақтастық туралы ресми меморандумға қол қоюды ұсынды. Орталығымыздың басшылығы бұл бастаманы толық қолдап, өзара оқыту форматын ұсынды: біз де өз кезегімізде олардың мамандары үшін орталығымызда біліктілікті арттыру курстарын өткізуге дайынбыз.

Мұндай тығыз халықаралық ынтымақтастық үлкен пайда әкеліп, балаларымыздың денсаулығы мен бақытты болашағы жолында жаңа мүмкіндіктерге жол ашатынына сенімдіміз!