2026 жылғы 28–29 қазанда «Astana Tourism» ЖШС-ның қолдауымен «Ұлттық балаларды оңалту орталығы» КеАҚ Астанадағы EXPO халықаралық көрме орталығында өткен United Medical Expo 2026 халықаралық медициналық көрмесіне қатысты.

Көрмеге Қазақстан, Оңтүстік Корея, Қытай, Германия, Түркия және басқа да елдерді қоса алғанда, 15 мемлекеттен 100-ден астам компания қатысты. Олардың қатарында JCI халықаралық аккредиттеуінен өткен клиникалар, жетекші медициналық ұйымдар, медициналық жабдық өндірушілер және инновациялық медициналық технологиялар саласында жұмыс істейтін компаниялар болды.

Көрме аясында денсаулық сақтау саласындағы ынтымақтастыққа арналған Қазақстан-Корея семинары өтті. Семинар барысында кореялық компаниялар өз қызметін, заманауи медициналық әзірлемелерін және Қазақстанмен ынтымақтастықты дамытудың перспективалы бағыттарын таныстырды.

Орталықтың көрмеге қатысуының маңызды нәтижелерінің бірі кореялық Telochips Co., Ltd. компаниясымен өзара түсіністік туралы меморандумға қол қою болды. Құжат өзара тиімді ынтымақтастықты дамытуға, тәжірибе алмасуға және медициналық оңалту саласына заманауи шешімдерді енгізуге мүмкіндік жасауға бағытталған. Орталық әріптестік байланыстарды одан әрі нығайтуға және бірлескен бастамаларды іске асыруға мүдделілік танытады.