Ұлттық балаларды оңалту орталығы

Позициялау – баланың өмір сапасына әсер ететін маңызды күтім бөлігі.

Балаға оңалту тек жаттығу залында ғана емес, күні бойы дұрыс дене қалпын сақтаудан басталады. Дұрыс позициялау баланың тынысына, қозғалысына, жайлылығына және аурудың асқынбауына тікелей әсер етеді.

Біздің орталықта жас мейіргерлерге арналған Позициялау мектебі құрылды.

Себебі позициялау – науқастың өмір сапасын арттыратын мейіргерлік көмектің ең маңызды бөлігі.

ҚР Парламенті Сенатының депутаты Жексенбай Бибігүл Нұрғалиқызы өз құзыреті аясында даму бұзылыстары қаупі бар нәрестелерді қолдау мәселелерін мемлекеттік деңгейде қарау бастамасын көтерді.

26 қыркүйекте Бибігүл Нұрғалиқызы Алматы қаласынан келген оңалту клиникасының өкілдерімен бірге Ұлттық балаларды оңалту орталығына келді.

Кездесу барысында балаларға ерте көмек көрсетуді ұйымдастыру тәсілдері және еліміздегі оңалту жүйесін жетілдіру мүмкіндіктері талқыланды.

ҰБОО Басқарма төрағасы Ажар Ғиният қонақтарға Орталықтың жұмыс жүйесін таныстырып, балаларда мүгедектіктің қалыптасу қаупін азайту үшін ерте оңалтуды дамыту бойынша тәжірибесімен және ұсыныстарымен бөлісті.

7 қыркүйек – Ұлттық балаларды оңалту орталығының туған күні. Осы айтулы датаға және Халықаралық кинезотерапевттер күніне орай 4–5 қыркүйек күндері ұжымдық волейбол турнирі ұйымдастырылды.

Жарысқа Орталық қызметкерлерінен құралған 4 команда қатысып, бірінші күні жартылай финалға шығу үшін бақ сынады. Ал екінші күні тартысты ойындар өтіп, жеңімпаздар мен жүлдегерлер анықталды.

Турнир спорттық бәсеке ғана емес, сонымен бірге ұжымның ұйымшылдығы мен кәсіби рухын көрсеткен маңызды шара болды.

5 - қыркүйек күні Ұлттық балаларды оңалту орталығының бастамасымен еліміздің барлық өңірлерінен денсаулық сақтау басқармаларының бас штаттан тыс балаларды оңалту мамандарының қатысуымен онлайн семинар-кеңес өтті.

Іс-шараға сондай-ақ ҚР Денсаулық сақтау министрлігі Ана мен бала денсаулығын қорғау департаментінің бас сарапшысы Айнұр Жұмағұлқызы Қабылова қатысты.

Семинар барысында мына мәселелер талқыланды:

• 2025 жылдың бірінші жарты жылдығындағы балаларды оңалту қызметінің қорытындысы;
• Балалар реабилитологтары кеңесінің мақсаты, міндеттері және жұмыс жоспары;
• 2025 жылғы Халықаралық конференция Резолюциясының орындалу барысы;
• «Орталық Азия медициналық реабилитология вестнигі» журналы мен «Оңалту» ассоциациясының қызметі;
• Өңірлерге ұйымдастырушылық-әдістемелік сапарлардың нәтижелері.

ҰБОО Басқарма төрағасы Ажар Ғиният өз сөзінде бұл кездесудің еліміздегі балаларды оңалту қызметін дамытудағы маңызын атап өтті.